Ashok Yewale
वाई : सिद्धगिरी मठ, संस्थान कणेरी (कोल्हापूर) चे ४९ वे मठाधिपती श्री समर्थ सदगुरू काडसिद्धेश्वर स्वामी महाराज यांच्या विशेष ‘अध्यात्म सोहळ्या’चे आयोजन बुधवार, दिनांक २५ मार्च २०२६ रोजी वाई येथील सिद्धनाथवाडी येथे करण्यात आले आहे. या निमित्ताने वाई आणि पंचक्रोशीतील भाविकांना आध्यात्मिक विचारांची मोठी पर्वणी लाभणार आहे.
बुधवारी सायंकाळी ४ वाजता सांप्रदायिक भजनाने सोहळ्याची सुरुवात होईल. त्यानंतर सायंकाळी ५ वाजता स्वामी महाराजांचे टाळ-मृदंगाच्या गजरात आणि दिंडीने भव्य स्वागत करण्यात येईल. यानंतर पाद्यपूजा आणि दासबोध वाचन पार पडणार असून सायंकाळी ६.३० वाजता स्वामींचे प्रवचन होईल.
प्रवचनानंतर आरती, दर्शन आणि महाप्रसादाचे आयोजन करण्यात आले आहे. सिद्धनाथवाडी येथील अंबिका मंदिरासमोर पार पडणाऱ्या या प्रवचन सोहळ्याचे आयोजन ग्रामस्थ मंडळ सिद्धनाथवाडी आणि श्री समर्थ सदगुरू काडसिद्धेश्वर गुरुभक्त, सातारा जिल्हा यांच्या वतीने या करण्यात आले आहे. या मंगलमयी सोहळ्याचा लाभ सर्व भाविकांनी घ्यावा, असे आवाहन आयोजकांच्या वतीने करण्यात आले आहे.
